Beki wa KMC Kelvin Kijili amemuomba radhi kiungo wa Simba Jonas Mkude baada ya kumfanyia madhambi yaliyopelekea nyota huyo kukimbizwa Hospitalini kwa ajili ya matibabu
Kijili amesema halikuwa kusudio lake kumuumiza Mkude katika mchezo wa kirafiki ambao ulipigwa juzi kwenye uwanja wa Mo Simba Arena, Bunju jijini Dar es salaam na Simba kuibuka na ushindi wa mabao 3-1
"Namuomba radhi Mkude kwani halikuwa lengo langu kumuumiza. Ilikuwa katika jitihada za kuwania mpira kwa bahati mbaya yeye alipiga chini ya kiatu changu na kuumiia vidole. Nitamtafuta, nimuombe radhi na namtakia kila la kheri aweze kupona haraka ili aendelee na majukumu yake. Mpira ndio kazi yetu na nafahamu kuna maisha nje ya mpira," alisema Kijili
Mkude alipatiwa matibabu ya awali Hospitali ya Rabininsia Memorial kisha kupelekwa Hospitali ya Taifa ya Muhimbili ambako ndiko anatibiwa sasa
Fundi huyo wa mpira amesema ameumia vidole vya mguu wa kulia na amekuwa na maumivu makali tangu juzi
Daktari wa Simba Dk Yassin Gembe amesema bado hawajabaini ukubwa wa jeraha la kiungo huyo, atafanyiwa vipimo baada ya saa 72
