Kiungo mahiri wa Simba Jonas Mkude amesema majeraha yatakuwa mengi kwa wachezaji pale ligi itakaporejea kutokana na kukaa nje kwa muda mrefu huku wakifanya mazoezi ya aina moja
Ratiba ya Ligi Kuu kurejea, imetolewa mwanzoni mwa wiki Simba ikitarajiwa kuanzia uwanja wa Taifa Juni 14 kwa kuumana na Ruvu Shooting
Mkude amesema wakati wa mapumziko ya corona, wachezaji walikuwa wakifanya mazoezi ya nguvu jambo ambalo huenda litawasumbua pale ligi itakaporejea
Hata hivyo Mkude amesema yeye binafsi anafanya mazoezi kwa kufuata maelekezo anayopewa na makocha wake ili kuhakikisha anajiepusha na changamoto hiyo
"Wakati huu tunapofanya mazoezi ya timu tunahitaji kuwa waangalifu kuepuka majeraha ili kuifanya miili yetu iwe tayari kwa ajili ya mechi zinazokuja mbeleni. Ndio maana hata mwanzoni mwa msimu makocha hutoa program tofauti ya mazoezi ili kujenga, ufit, stamina na mengineyo," alisema
"Kwa wale ambao hawatafanya mazoezi sahihi wakati huu, watakuwa na wakati mgumu ligi ikianza. Kwa upande wetu Simba makocha wetu wako makini, tunafanya mazoezi ambayo yatatusaidia kuwa timamu kimwili tayari kumalizia mechi zilizobaki"
Katika mechi 10 zilizobaki, Simba itahitaji kushinda angalau mechi tano ili kutetea ubingwa kwa msimu wa tatu mfululizo
