Kiungo fundi wa Simba Francis Kahata alirejea nchini juzi baada ya jitihada za ziada kufanikiwa kumchomoa huko Kenya ambako changamoto ya corona imesababisha nchi hiyo kuwa imefunga mipaka
Kahata alianza mazoezi jana, leo akiendelea kujifua na wachezaji wengine ambao walianza program za mazoezi tangu Jumatano iliyopita
Nyota huyo amesema wakati yuko Kenya alikuwa akifanya mazoezi kwa kufuata maelekezo yaliyokuwa yakitolewa na benchi la ufundi
Hata hivyo, Kahata amesema kama timu wanahitaji kujifua kukaa sawa tayari kwa mikiki mikiki ya ligi inayorejea Juni 13, Simba ikitarajiwa kushuka dimbani Juni 14 kuikabili Ruvu Shooting
Kahata amesema michezo ya mwanzo haitakuwa rahisi kwa timu zote kutokana na ukweli kuwa wamekaa muda mrefu bila ya kucheza mpira
"Michezo ya kwanza haitakuwa rahisi, wajua miezi miwili bila ya kucheza mpira ni mingi sana. Timu zitaanza taratibu lakini nadhani baada ya michezo mitatu tutakuwa sawa. Kama timu tuko vizuri na malengo yetu ni kutetea ubingwa. Timu yetu inaundwa na wachezaji wenye uwezo mkubwa matumani ya kutetea ubingwa wetu wa ligi na kunyakua taji la FA ni akubwa" alisema Kahata baada ya kutua kambini
Simba inaendelea na mazoezi katika uwanja wake wa Mo Simba Arena
