Kocha Mkuu wa Simba, Sven Vandenbroeck, anataka kuhakikisha safu yake ya ushambuliaji haipati changamoto baada ya kuzidi kumnoa straika kinda, Cyprian Kipenye, aliyempandisha kutoka timu ya vijana.
Kipenye ni kati ya wachezaji wa timu ya vijana ya Simba waliofanya vizuri katika Kombe la Mapinduzi mwaka huu huko Zanzibar, hivyo kumvutia kocha huyo na kuendelea kuwepo kikosi cha wakubwa.
Sven anaonekana kumkubali mchezaji huyo kutokana na uwezo wake, hivyo kumuamini na kumjumuisha timu ya wakubwa ambapo kwasasa anafanya nayo mazoezi mwanzo mwisho.
Inaonekana wazi kocha huyo ameona Kipenye ndiye anayeweza kuziba pengo la washambuliaji wakongwe waliopo endapo watapata majeraha au kutaka kuwapumzisha.
Ikumbukwe kipindi cha nyuma wakati John Bocco alipokuwa majeruhi na baadaye Miraj Athumani kuumia, kocha huyo alipata changamoto katika eneo la mbele na kumfanya achezeshe straika mmoja, Meddie Kagere.
Hali hiyo imetokana na Rashid Juma kuonekana hayupo fiti kama ilivyokuwa msimu uliopita, hivyo kumfanya Sven atumie zaidi viungo kumsaidia Kagere.
Kitendo cha kuamua kumpandisha moja kwa moja Kipenye, ni kuepuka kukutana na changamoto ya kukosa straika anayeweza kumfungia mabao pindi wale wanaotegemewa wanapokosekana.
Katika mazoezi ya kikosi hicho yanayoendelea kwasasa huko Mo Simba Arena, jijini Dar es Salaam, inadhihirisha Sven na msaidizi wake, Seleman Matola, wamepania kuhakikisha kijana huyo anaiva, ukizingatia bado wanakabiliwa na mechi muhimu.
