Winga wa Simba Miraji Athumani jana alikuwa miongoni mwa wachezaji wa kikosi cha mabingwa hao wa nchi kilichoanza maandalizi tayari kukamilisha ngwe iliyobaki Ligi Kuu ya Vodacom pamoja na kombe la FA
Nyota huyo amerejea kikosi baada ya kukosekana dimbani kwa takribani miezi minne kutokana na majeruhi sasa ikiwa ni miezi sita ukiongeza na miezi miwili ya corona
Kocha Mkuu wa Simba Sven Vandenbroeck ameeleza kufurahishwa na utimamu wa winga huyo ambaye pia anamudu kucheza nafasi ya ushambuliaji wa kati
Sven amesema kurejea kwake kutazidi kuimarisha safu yake ya ushambuliaji
"Miraji amerejea na amepona kabisa hata yale mapumziko ya corona yamemsaidia kuwa fiti na kama mnavyomuona hata katika mazoezi yupo vizuri. Nimefurahi kumuona kwani nafahamu anaweza kucheza kama winga au mshambuliaji wa kati kwa hiyo atatupa machaguo zaidi ya upangaji wa timu," amesema Sven
Miraji alipata nafasi za kucheza mechi 10 za kwanza msimu huu akafanikiwa kufunga mabao sita na kutoa pasi mbili za mabao
