Baadhi ya wadau wa klabu ya Simba wameiomba Serikali kuangalia upya mpango wa kuruhusu mashabiki 20 tu kuingia uwanjani kuzishangilia timu zao wakati ligi itakaporejea
Tayari Serikali imetangaza kuwa ligi itarejea huku mechi zikichezwa bila ya mashabiki lakini wakitoa ruhusa maalum ya mashabiki 10 kwa kila timu kuingia uwanjani kuzishangilia timu zao
Mwenyekiti wa Tawi la Wekundu wa Msimbazi, Ubungo Terminal Justine Joel amesema idadi hiyo ni ndogo sana, anapendekeza angalau mashabiki 300 waweze kuruhusiwa
"Wangeweza kuruhusu makundi matatu ya Ngoma kwa kila timu ambayo kila kundi linakuwa na mashabiki 50 hivyo kufanya idadi ya mashabiki 300 ambao hawatasababisha mkusanyiko kwani wanaweza kukaa katika umbali unaopendekezwa," amesema
"Ugonjwa huu wa corona upo na wataalam wanasema tutaendelea kuishi nao kwa muda mrefu hivyo ni vyema tukaendelea na maisha yetu lakini muhimu tuchukue tahadhari kama inayoelekezwa na wataalam wa Afya"
Simba ndio klabu ambayo inaongoza kwa kuingiza mashabiki wengi kwenye michezo yake na hakika itaathiriwa kwa kiasi kikubwa na uamuzi huu wa Serikali ambao hata hivyo imelazimika kuchukuliwa ili kuepusha maambukizi ya ugonjwa wa corona
