Meddie Kagere 'bull-striker' mwamba kutoka nchini Rwanda tayari yuko katika ardhi ya Tanzania akitua nchini kwa usafiri wa barabara baada ya Serikali ya Rwanda kuwa bado imesitisha safari za anga
Leo Kagere anafanyiwa vipimo vya Afya na kama hatakuwa na tatizo lolote ataingia kambini na wachezaji wengine ambao tayari wameanza kuwasili kambini kwa ajili ya zoezi hilo
Kagere amesema ni faraja michezo kurejea baada ya kukaa nje kwa zaidi ya miezi miwili kutokana na janga la corona
Lakini ligi kurejea bila ya mashabiki kutawanyima fursa ya kufurahi na mashabiki wao ambao siku zote wamekuwa nao bega kwa bega kwenye kila mechi
"Kwa kweli tutawakumbuka sana mashabiki wetu kwani tumekuwa nao kila mchezo wakija kwa wingi uwanjani. Tuliwahitaji sana lakini ni muhimu kulinda afya ya kila mmoja wetu kutokana na ugonjwa huu wa corona," alisema Kagere
Kagere anayeongoza mbio za kuwania kiatu cha dhahabu akiwa amefunga mabao 19, amesema ana matumaini kikosi chao kitarejea na nguvu waliyomaliza nao ingawa watahitaji angalau mechi mbili au tatu kuwa katika kiwango kilichozoeleka
"Hatukuwa pamoja kwa zaidi ya miezi miwili. Kiafya tunaweza kuwa sawa kwani tulikuwa tukifanya mazoezi lakini kitimu pengine tutahitaji muda kidogo kurejea katika mwendo uliozoeleka"
