Mwenyekiti wa zamani wa klabu ya Simba Ismail Aden Rage ambaye pia amewahi kuwa Mbunge wa Tabora Mjini kupitia Chama cha Mapinduzi (CCM), amejikuta katika mikono ya Sheria baada ya kukamatwa na Taasisi ya kuzuia na kupambana na Rushwa (TAKUKURU) akikabiliwa na tuhuma za rushwa pamoja na kudaiwa kuanza kampeni za uchaguzi kabla ya wakati wake
Taarifa iliyotolewa jana na Mkuu wa TAKUKURU mkoa wa Tabora, Mussa Chaulo ilieleza kuwa mnamo Mei 23, 2020, Rage ambaye ni Mkurugenzi wa Voice of Tabora alishikiliwa baada ya TAKUKURU kupata taarifa kutoka chanzo cha siri kikieleza kuwa ameanza kampeni za uchaguzi kabla ya wakati.
Kwa mujibu wa taarifa hiyo, ilieleza kuwa kiongozi huyo wa zamani wa Simba akiwa katika maeneo kadhaa ndani ya manispaa ya Tabora kwa nyakati tofauti alikusanya wapiga kura ambao ni viongozi wa Chama Cha Mapinduzi (CCM) ngazi ya kata na matawi kwa lengo la kuwashawishi ili wampigie kura.
