Uongozi wa klabu ya Simba umetangaza kuwa kikosi cha timu hiyo kitarejea rasmi mazoezini siku ya Jumatano ijayo baada ya sikukuu ya Eid El Fitri
Akizungumza kupitia ukurasa wa Youtube wa klabu ya Simba, Mtendaji Mkuu wa mabingwa hao wa nchi Senzo Mazingisa amesema wamepokea kwa furaha uamuzi wa Serikali kurejesha ligi kuu
Senzo amesema lengo lao ni kuhakikisha wanashinda taji la ligi kuu pamoja na michuano ya kombe la FA
Amesema wachezaji wa kigeni ambao wako nje ya nchi wameendelea kuwasiliana nao kuangaliwa utaratibu wa kuwarejesha mapema huku akibainisha mmoja wa nyota hao atawasili nchini Jumatatu
"Tunafurahi kwamba mpira umerudi kuanzia Juni 1, 2020 .Tumeanza mipango yetu na tumepanga kuanza mazoezi Jumatano baada ya Eid," alisema Senzo
"Wachezaji wetu wote ambao wapo nje ya Tanzania tunawasiliana nao na mmoja kati ya wachezaji hao atakuwepo nchini Jumatatu. Wengine tunatarajia watakuwepo nchini kabla hatujaanza mazoezi."
Aidha kuhusu masuala ya usajili, Senzo amesema mashabiki wawe na subira wakati uongozi ukikamilisha baadhi ya masuala ikiwemo kuwaongezea mikataba wachezaji wanaoendelea kubaki na Simba
"Mashabiki wetu watupe muda na nafasi kufanya kazi nzuri kwenye usajili. Tunaendelea kufanyia kazi kwa wachezaji waliopo kuongeza mikataba mipya na mchezaji yoyote ambaye tutamsajili tutatoa taarifa. Kwasasa hatujasajili mchezaji yeyote."
Simba yazindua tovuti ya klabu
Katika hatua nyingine, uongozi wa klabu ya Simba umeitambulisha tovuti rasmi ya klabu ambayo itakuwa ikitoa taarifa muhimu za klabu pamoja na matukio mengine yanayowahusu mabingwa hao wa nchi
