Nyota wa Simba ambao wako nje ya nchi wanaweza kuchelewa kurejea nchini kutokana na vikwazo ambavyo viko katika nchi zao licha ya Serikali ya Tanzania kuruhusu usafiri wa anga
Inaelezwa wakati wowote ligi inaweza kurejea kumalizia mechi zilizobaki baada ya Rais Dk John Magufuli kuahidi kuwa anaweza kutoa ruhusa hiyo wiki hii
Nyota watano wa Simba bado wako nje ya nchi wakisubiri maelekezo zaidi katika nchi zao ambazo baadhi zimefunga mipaka huku nyingine zikiwa bado hazijaruhusu usafiri wa anga
Kinara wa mabao ligi kuu ya Vodacom Meddie Kagere, ni miongoni mwa wachezaji hao ambao wanasubiri ruhusa katika nchi zao
Rwanda bado haijaruhusu usafiri wa anga pamoja na kuwa huenda ruhusa hiyo ikatolewa karibuni baada ya nchi hiyo kuanza kuondoa lockdown
Nyota wengine ambao wako nje ni Clatous Chama (Zambia), Luis Miquissone (Msumbiji), Sharaff Shiboub (Sudan) na Francis Kahata (Kenya)
Wachezaji hao watakaporejea pia watakaa karantini kwa siku 14
Kocha Msaidizi wa Simba Selemani Matola amesema wako tayari kupambana kumalizia mechi zilizobaki hata ikitokea wachezaji hao watachelewa
Matola amesema wanasubri ruhusa ya Serikali ili kuwaita wachezaji kambini kuanza maandalizi
Amesema wataandaa timu kulingana na wachezaji watakaokuwepo
