Tetesi zilizoibuliwa viungani leo ni uwepo wa taarifa ya mabingwa wa nchi Simba kujitosa kumuwania mshambuliaji wa zamani wa Rayon Sports Michael Sarpong
Nyota huyo raia wa Ghana yuko huru baada ya klabu ya Rayon kuvunja mkataba wake mwezi uliopita kufuatia matamshi yake ambayo aliyatoa kwenye mahojiano na chombo kimoja cha habari huko Rwanda
Nyota huo alikuwa akipinga uamuzi wa klabu hiyo kuwakata wachezaji mishahara baada ya timu kukumbwa na changamoto za kiuchumi kutokana na janga la corona
Sarpong mwenyewe amethibitisha kufanya mazungumzo na mmoja wa viongozi wa Simba
Wiki iliyopita ziliibuliwa tetesi klabu ya Yanga kupitia wadhamini wao GSM nao walijitosa kumuwania mshambuliaji huyo ambaye mpaka ligi ya Rwanda inasimama, alikuwa amefunga mabao nane
Sarpong ni mmoja wa washambuliaji hatari kwenye ligi kuu ya Rwanda akiwa amefunga jumla ya mabao 24 katika misimu yake miwili kwenye ligi hiyo
Simba inatarajiwa kusajili mshambuliaji mmoja wa kati ambaye atawapa 'back-up' Meddie Kagere na John Bocco
