Leo ni siku ya kumbukumbu ya kifo cha kiungo wa zamani wa Simba Patrick Mutesa Mafisango kilichotokea kwa ajali ya gari miaka 8 iliyopita.
Mafisango, daima atakumbukwa kwa mchango wake katika Ligi Kuu ya Vodacom
Mafisango alifariki kwa ajali ya gari iliyotokea maeneo ya Veta Chang’ombe, alipokuwa akijaribu kumkwepa mwendesha pikipiki, ambapo gari lake lilipoteza mwelekeo, kuacha njia na kutumbukia mtaroni na kugharimu maisha ya mchezaji huyo.
Kifo chake kiliacha taharuki hasa kwa wapenzi wa soka, kwani alikuwa ni mchezaji wa aina yake Simba, hakuwahi kuwa nahodha wa timu kama kwenye timu yake ya APR ya Rwanda, lakini alikuwa ni zaidi ya nahodha kwani aliweza kuhamasisha wenzake kucheza bila kuchoka na kutokata tamaa hata pale Simba inaposhambuliwa na timu pinzani au hata kufungwa.
Alifariki katika wakati ambao klabu yake ilikuwa inatarajia mengi kutoka kwake. Huyu alikuwa mchezaji tegemeo kwenye kikosi cha Simba na hakuna kingine kilichokuwa kinamfanya awe tegemeo zaidi ya jitihada zake uwanjani
