Uongozi wa klabu ya Simba uko kwenye hatua za mwisho kuandaa kanzi data ambayo itahifadhi taarifa za Wanachama wote wa klabu hiyo
Mkurugenzi wa Wanachama na mashabiki Hashim Mbaga amesema kupitia utaratibu huo, watakuwa na taarifa sahihi ya idadi ya Wanachama na mashabiki wao
"Tunataka kuachana na huu utaratibu wa kukisia idadi halisi ya wanachama wetu, ndio maana utaratibu huu umetengenezwa kutuwezesha kuwa na takwimu sahihi," amesema
"Zoezi la kwanza tutapita mikoa yote kuhakiki wanachama kwa kuchukua taarifa zao sahihi zikiwemo picha na namba zao za simu pamoja na kubaini wanachama ambao hawajalipa ada zao"
"Baadae tutapita kwenye matawi yetu kufahamu idadi halisi na kwa Matawi ambayo yatakuwa hajaandikishwa, kutakuwa na zoezi la uandikishaji"
Mbaga ameongeza kuwa kanzi data hiyo itarahisisha mawasiliano kati ya uongozi wa Simba na Wanachama wake kwani taarifa zote muhimu zitakuwa zikitumwa moja kwa moja kwa Wanachama ambao wameandikishwa kwenye mfumo
Mfumo huo pia utaiwezesha klabu ya Simba kunufaika kutokana na wingi wa Wanachama na mashabiki wake kupitia ukusanyaji wa ada mbalimbali pamoja na mauzo ya bidhaa za klabu
