Wakati wadau wakisubiri Serikali ipulize kipenga cha kurejea ligi kuu ya Vodacom kwa ajili ya kumalizia mechi zilizobaki, Meneja wa klabu ya Simba Patrick Rweyemamu amesema, wamejipanga kukamilisha ligi hiyo kwa kishindo
Kimahesabu, Simba inahitaji kushinda mechi tano tu kuweza kutwaa ubingwa kwa msimu wa tatu mfululizo kutoka mechi 10 zilizobaki
Hata hivyo Rweyemamu amesema pamoja na mazingira hayo, amesema hawatadharau mechi ili kuhakikisha wanakamilisha lengo lao
Rweyemamu amesema mechi za lala salama mara nyingi zinakuwa ngumu kutokana na baadhi ya timu kupambana katika jitihada za kujinusu na kuteremka daraja
Amesema uongozi wao wa tofauti ya alama 17 dhidi ya timu inayofuata nafasi ya pili, umewaweka katika nafasi nzuri ya kutwaa ubingwa
"Sisi tumebakiza mechi tano tu ili tutangazwe mabingwa wapya kwa msimu wa tatu mfululizo, ingawa tunajua kutakuwa na ugumu katika baadhi ya mechi, hasa ukicheza na timu zinazotaka kujinasua, lakini tumejipanga kuendeleza kuvuna matokeo mazuri," amesema
Aidha Rweyemamu amesisitiza kuwa ili kikosi chao kisipoteze malengo yake, kimejiandaa kurejea kwa kasi ili kusaka matokeo mazuri na haitadharau mchezo wowote wa ligi hiyo na katika mashindano ya Kombe la FA ambayo yameingia kwenye hatua ya robo fainali.
Alisema wachezaji wao wote wanajua wanachotakiwa kukifanya katika hatua ya lala salama na wanaamini huu ni wakati mwingine wa kujiongezea thamani kwa kuonyesha viwango vya juu.
"Jambo ambalo halitulifahamu mpaka sasa ni kujua ligi itarejea katika mazingira gani, lakini hata mazingira hayo hayo tusiyoyajua, tutayapokea kama yatakavyokuwa, changamoto itakuwa katika mechi ya kwanza na ya pili, mechi ya tatu tutakuwa tumeshazoea na maisha lazima yaendelee"
