Mshambuliaji wa Simba, raia wa Rwanda, Meddie Kagere, amewatumia ujumbe mzito wachezaji wanzake kuhakikisha wanafanya mazoezi pasipo kuzembea ili Ligi Kuu Tanzania Bara ikirudi waweze kuendeleza moto ule ule.
Kagere na wachezaji wenzake wa kigeni wakiwamo Clatous Chama (Zambia), Luis Miquissone (Msumbiji), Francis Kahata (Kenya) na Sharaf Shaboub (Sudan), wamekwama kurejea nchini, baada ya nchi zao kufunga mipaka kutokana na tishio la maambukizi ya virusi vya corona.
Wachezaji hao walikwenda kwao kujiunga na timu za taifa ambazo zilikuwa zinakabiliwa na michuano ya Mataifa ya Afrika (AFCON), ambayo baadaye ilisitishwa na Shirikisho la Soka Afrika kutokana na nchi kukumbwa na corona.
Kutokana na hali hiyo, Serikali ilisitisha shughuli zote za mikusanyiko ya watu, ikiwamo Ligi Kuu Bara inayoelezwa inaweza kuendelea mwezi ujao.
Hata hivyo, Kagere amesema janga la corona bado ni kubwa lakini wachezaji wanatakiwa kuendelea kufanya mazoezi kwa lengo la kulinda viwango.
Kagere aliandika katika ukurasa wake wa Instagram na mwenzake Mohammed Hussein kuwa amekuwa akizingatia program maalum ya mazoezi waliyopewa na makocha wao baada ya ligi hiyo kusimamishwa na Serikali Machi 17, mwaka huu.
"Huku kwetu bado hali ni mbaya, nadhani tunahitaji kuendela kutulia nawaombeni tuendelee kujifua kama tuko pamoja, msipuuze mazoezi na itapendeza mkijiongezea ya ziada," aliandika.
Kagere amekuwa akiwasialiana na mchezjai mmoja mmoja kuhamasisha suala zima la kufanya mazoezi ili watakaporejea waendeleze moto ule ule
