Baada ya Rais John Magufuli kutangaza kuwa anafikiria kurejesha mikiki mikiki ya ligi kuu, mshambuliaji wa Simba, Meddie Kagere anafikiria utaratibu utakaomuwezesha kurejea nchini mapema
Kagere ambaye ni raia wa Rwanda, anakabiliwa na changamoto ya usafiri baada ya Rais wa nchi hiyo Paul Kagame, kufunga mipaka kutokana na hofu ya kuenea kwa maambukizi ya virusi vya corona, vinavyosababisha ugonjwa wa Covid 19.
Rafiki wa karibu wa mshambuliaji huyo, amesema Kagere tangu aliposikia kauli ya Rais Magufuli, kila mara anaulizia kinachoendelea Tanzania.
Rafiki huyo wa Kagere alisema siku ya kwanza tu, Rais Magufuli alipoongea alimtaka amfafanulie kila kitu kama ametaja tarehe ya ligi hiyo kurejea.
"Kagere huko aliko hatulii, kila mara anaulizia maendeleo ya Ligi kurudi, siku ile tu kasikia Rais kaongea, aliniambia nimuelezee kwa undani nini amekisema," amesema
Kagere ndiye kinara wa mabao ligi kuu ya Vodacom akiwa amefunga mabao 19, mabao nane zaidi ya Yusufu Mhilu na Reliants Lusajo wanaomfuatia
Mbabe huyo wa kuzifumania nyavu, anataka kuvunja rekodi ya mabao 23 aliyojiwekea msimu uliopita
