Kiungo fundi wa mpira Ibrahim Ajibu Migomba kwa mara ya kwanza amezungumzia uamuzi wake wa kujiunga na klabu ya Simba licha ya vigogo wa soka barani Afrika TP Mazembe kuitaka saini yake usajili wa mwaka jana
Ajibu amesema aliamua kuipotezea ofa hiyo baada ya kupokea ushauri kutoka kwa familia yake na wadau mbalimbali wa soka nchini akiwemo nahodha wa Taifa Stars Mbwana Samatta ambaye aliwahi kucheza TP Mazembe
"Nilifikia uamuzi wa kusaini Simba baada ya kujadiliana na familia yangu na wadau. Lakini pia ofa ya Simba ilikuwa nono kuliko ofa ambayo waliitoa Mazembe," alisema Ajibu
"Niliongea na Samatta (Mbwana) ili anipe uzoefu wake kuhusu klabu ya TP Mazembe. Akanifahamisha mengi lakini mwisho wa siku akaniambia uamuzi wa mwisho nifanye mwenyewe kwani hataki kuingia kwenye lawama pale mambo yatakapokwenda kinyume"
"Alinishauri niende nikacheze mpira sehemu ambayo nitakuwa na furaha. Lakini kubwa zaidi mimi kama mchezaji naangalia maslahi yangu. Kuna maisha baada ya mpira, sitaki nije kuonyeshewa vidole kuwa sikufanya jambo la maana pamoja na kuwa na kipindi kizuri wakati nacheza soka," alisema
Inaelezwa klabu ya TP Mazembe ilimpa Ajibu ofa inayofikia Tsh Milioni 60 wakati klabu ya Simba ilimchukua kwa dau la Tsh Milioni 80
