Mshambuliaji wa zamani wa Simba Mohammed Rashid ambaye kwa sasa anaichezea Polisi Tanzania, amesema kitendo cha mashabiki kuhitaji matokeo ni moja ya mambo yaliyosababisha kutopata namba ya kudumu katika kikosi cha Simba.
Rashid ambaye amewahi kucheza Simba kabla ya kwenda Polisi Tanzania alisema mashabiki wa timu kubwa hawana subira wanaamini kila mchezaji anayesajiliwa anatakiwa kufanya vizuri kila anapopata nafasi ya kucheza.
Akizungumza Dar es Salaam jana, Rashid alibainisha licha ya changamoto za kupata upinzani wa namba kutoka kwa wachezaji wazoefu kama John Bocco lakini anaamini presha ni sababu iliyomfanya kushindwa kuonesha uwezo wake.
"Unaweza ukafanya vizuri kwenye timu zingine lakini ukifika timu kubwa mashabiki hawana subira wanataka ukipewa nafasi uoneshe kitu, ukikosea basi wanakosa imani na wewe ndicho kilichonitibulia mimi," Rashid alinukuliwa na HabariLeo
Rashid anayecheza nafasi ya ushambuliaji, alisajiliwa na Simba akitokea Klabu ya Tanzania Prison baada ya kuonesha uhodari wa kufumania nyavu kwa michezo ya Ligi Kuu Tanzania Bara.
Rashid alisema wakati anajiunga Simba alikutana na wachezaji watano wote wakicheza nafasi za mbele akiwemo Bocco, Meddie Kagere, Marcelo Kaheza, Clatous Chama na Juma Rashid hivyo mchezaji aliyekuwa anafanya vizuri alikuwa anapata namba ya kudumu kikosi cha kwanza.
“Ili kuwa kikosi cha wachezaji kinachomaliza mchezo kwa ushindi kinakuwa na nafasi kubwa ya kucheza mchezo unaokuja kwa kuwa kinakuwa na morali ya ushindi,” alisema Rashid
Kabla ya kutua Polisi Tanzania, Mo Rashid aliitumikia KMC kwa mkopo
