Kadiri siku zinavyozidi kusonga mbele, matumaini ya ligi kuu ya Vodacom kurejea yanazidi kufifia kutokana na changamoto ya ugonjwa wa corona kuwa bado ni tatizo duniani
Wadau wa soka nchini wanasubiri kauli ya wasimamizi wa soka Tanzania (TFF) ambao wameeleza kusubiri muongozo wa Serikali
Baadhi ya nchi barani Afrika wakiwemo majirani zetu Kenya, wamechukua uamuzi wa kumaliza msimu kutokana na ukweli kuwa huenda janga la corona likaendelea kuisumbua dunia kwa muda mrefu zaidi
Kama ilivyo kwa wadau wengine, Mtendaji Mkuu wa Simba Senzo Mazingisa, amesema wanasubiri kauli ya TFF kujua mustakabali wa ligi
Hata hivyo amesema TFF wanapaswa kutoa kauli mapema wasikae kimya kwa muda mrefu
"Sisi hatuna la kuzungumza, tunasubiri kauli yao. Wanatakiwa kuitisha Kikao cha Bodi ya ligi ambacho ni vyema kiwashirikishe viongozi wa klabu zote"
"Kikao hicho kitoe msimamo wa pamoja juu nini kifanyike kama zilivyofanya nchi nyingine ambazo tayari zimechukua maamuzi," amesema
Nae msemaji wa klabu ya Simba Haji Manara amesema anaamini kwa uamuzi wowote utakaotangazwa, ni lazima uwape klabu ya Simba haki wanayostahili
"Kwa uamuzi wowote utakaochukuliwa sisi tutaendelea kubaki namba moja. Kama ligi ikifutwa leo bingwa ni sisi, wakisema tucheze mechi zilizobaki bado bingwa atakuwa ni sisi na hata wakisema wafute wachukue matokeo ya msimu uliopita bingwa ni sisi"
"Jambo hili halipaswi kuchukua muda mrefu kwani kila litu kipo wazi," alisema Manara
Inaelezwa Kamati ya Utendaji ya TFF inatarajiwa kukutana wakati wowote kujadili mustakabali wa ligi baada ya Shirikisho la mpira barani Afrika (CAF) kuwatumia wanachama wake waraka unaowaelekeza waweke wazi msimamo wao kuhusu hatma za ligi za nchi zao katika kipindi cha siku saba
