Mtendaji Mkuu wa klabu ya Simba Senzo Mazingisa amesema changamoto ya ugonjwa wa corona ambayo imepelekea shughuli zote za michezo kusitishwa, imewaweka wadhamini wa vilabu kwenye wakati mgumu katika kutimiza majukumu yao
Barani Ulaya imeshuhudiwa vilabu vikichukua hatua ya kupunguza mishahara ya wachezaji wao ili kuweza kumudu gharama za uendeshaji baada ya makampuni yanayodhamnii vilabu hivyo kuathirika kiuchumi kutokana na corona
Senzo amesema wamejipanga kuiendesha klabu ya Simba kuhakikisha inavuka salama kipindi hiki ambacho kampuni nyingi zimeathiriwa
"Tulichonacho kama uongozi kipindi hiki ni kubaki na matumaini kwamba wadhamini watakwenda kutekeleza majukumu ya mikataba yao"
"Kwa maana hiyo ngoja tuone kwa upande wetu ni namna gani ambavyo tunajipanga ili kuweza kuendesha timu kipindi hiki ambacho sekta nyingi zimeguswa," amesema Senzo
Moja ya wadhamini wa klabu ya Simba ni kampuni ya SportPesa ambayo hujishughulisha na biashara wa ubashiri wa matokeo hasa ya mechi za mpira wa miguu
SportPesa ni miongoni mwa kampuni zilizoathirika kwa kiasi kikubwa baada ya ligi zote kubwa duniani kusimama kutokana na janga la corona
