Uongozi wa klabu ya Mtibwa Sugar umeonyesha kumnyemelea winga wa Simba Shiza Kichuya ambaye amerejea Msimbazi katika usajili wa dirisha dogo mwezi Januari 2020
Kichuya alisajiliwa na Simba mwaka 2016 akitokea klabu ya Mtibwa, alifanya mambo makubwa Msimbazi kabla ya kupata dili la kwenda kucheza soka nchini Misri msimu uliopita
Hata hivyo Simba ilimrejesha tena Msimbazi mwaka huu
Tangu kurejea nchini, Kichuya amekosa nafasi kwenye kikosi cha kwanza cha Simba huku ikielezwa kuwa kocha Sven Vandenbroeck bado hajavutiwa na kiwango chake
Msemaji wa Mtibwa Sugar Thobias Kifaru, amesema kama nyota huyo atarejea Manungu, watamrudisha katika ubora wake kama ilivyokuwa kwa Hassan Dilunga ambaye kwa sasa anatamba Msimbazi
"Kichuya ni mwanangu kama atataka kurudi nyumbani tunamkaribisha, hiki ni Chuo cha Tanzania akishindwa maisha ya huko aliko tunamkaribisha, tunampa mwezi mmoja atanolewa na atakuwa bora kuliko yule Kichuya wa mwanzo, " amesema
Kifaru alimtolea mfano mmoja wa wachezaji waliowahi kuonekana hawafai baada ya kucheza klabu mbalimbali kuwa ni Hassan Dilunga lakini aliporejea Mtibwa akatengenezwa na kurudi mpya na leo amekuwa ni mmoja wa wachezaji hatari kwenye kikosi cha Simba.
Pia alisema wachezaji wengi wakirudi kwenye klabu hiyo wanafanikiwa kwa sababu wamefanya uwekezaji mkubwa na wana kila kitu kinachohitajika kwenye soka tofauti na klabu nyingine.
Aidha Kifaru aliongeza kuwa Kichuya akirudi atapewa programu maalumu na kocha wao na yeye kama mzazi pia atampa maneno yatakayomjenga.
