Kiungo wa Simba, Ibrahim Ajibu, amekuwa mchezaji wa kwanza nchini kutoa msaada binafsi kwa wahitaji katika kipindi hiki ambacho dunia inakabiliwa na janga la ugonjwa wa COVID-19, unaosababishwa na virusi ya corona
Juzi, Ajibu alitoa msada kwa watoto yatima kwenye Kituo cha Umra kilichopo Magomeni Mikumi na Mayunga kilichopo Kinondoni Moscow, vyote vya jijini Dar es Salaam.
"Mimi Ajibu mchezaji wa Simba, kama Mtanzania, nimeguswa sana na janga lililotukabili kwenye nchini yetu na dunia kwa jumla la ugonjwa wa corona. Nimeamua kuanzisha kampeni hii ya kuisaidia jamii na watoto yatima, kwenye kampeni hii ya kujitolea, vifaa kama sanitizer [vitakasa mikono], ndoo za kunawia mikono, pamoja na chakula," Ajib amenukuliwa na gazeti la Nipashe
"Pia ningependa kutoa hamasa kwa wadau wengine ili kujiunge na mimi kufanikisha zoezi hizi."
Ajibu alisema kuwa hiyo si mara ya kwanza kwake kugawa misaada kwa watoto yatima, kwani ni sehemu ya maisha yake kufanya hivyo mara kadhaa.
"Nitakuwa nikiendelea kutoa kadri Mungu atakavyokuwa ananijaalia, nitakuwa nagawana na watoto yatima, kutegemeana na kipato changu," alisema.
Kujitolea kwa mchezaji huyo kumezua mjadala mkubwa mitaani kwa wadau wa soka kuwataka baadhi ya wachezaji wa Kitanzania vipenzi vya mashabiki kuiga mfano wake huku pia klabu kongwe nchini Simba na Yanga zikitakiwa kutobaki nyuma katika kipindi hiki kigumu ambacho taifa linakabiliwa na janga hilo la corona.
Kwa upande wa klabu ya Simba Ajibu ni mchezaji wa pili kufanya hivyo, baada ya Mkenya Francis Kahata kugawa lita 10,000 za maji kwa jamii inayomzunguka nyumbani kwao jijini Nairobi wakati huu wa janga la corona.
