kwa siku za karibuni kumeibuliwa mijadala inayomuhusu kiungo wa Simba Said Ndemla ambapo baadhi ya wadau wamemshauri aondoke Simba akatafute changamoto mahali pengine ambako atakuwa na uhakika wa kucheza ili kulinda kiwango chake
Ndemla ambaye yuko kwenye kikosi cha Simba kwa miaka nane sasa, amedumu Msimbazi kwa muda mrefu licha ya changamoto ya nafasi ya kudumu kwenye kikosi cha kwanza
Hata hivyo Ndemla mwenyewe amesema kwa hapa Tanzania anajisikia amani zaidi kucheza klabu ya Simba, ataondoka Simba kama atapata timu nje ya nchi
Amesema suala la kutopata nafasi kwenye kikosi cha kwanza linatokana na ushindani wa namba baina ya wachezaji waliopo na sio kuwa ameshuka kiwango
"Mkataba wangu na Simba unamalizika mwishoni mwa msimu, bado naipa timu yangu kipaumbele kama tutakubaliana waniongeze mkataba. Lakini kwa sasa nafuatilia nafasi ya kwenda kucheza nje ya nchi. Kama nitafanikiwa nitaondoka, lakini kama sitafanikiwa natamani niendelee kubaki hapa," amesema
"Kukosa nafasi kwenye kikosi cha kwanza ni changamoto inayoweza kutokea kwa mchezaji yeyote hasa inapotokea kuna ushindani wa namba kama ilivyo kwa Simba sasa, lakini muhimu ni kuendelea kupambana ili kujitengenezea mazingira ya kuaminiwa na kocha"
