Inaelezwa uongozi wa klabu ya Simba uko kwenye mazungumzo na Azam Fc wakitaka saini ya beki kisiki wa timu hiyo Yakubu Mohammed raia wa Ghana
Yakubu amekuwa na kiwango kizuri kunako klabu ya Azam tangu aliposajiliwa na timu hiyo misimu kadhaa iliyopita
Katika jitihada za kuisuka upya safu ya ulinzi, mabosi wa Simba wametua kwa Mghana huyo ambaye bado ana mkataba wa mwaka mmoja na klabu yake ya Azam
"Ni kweli Simba inamtaka Yakubu, mazungumzo yapo lakini mpaka sasa bado hakuna makubaliano yaliyofikiwa lakini kama kila kitu kitaenda sawasawa, msimu ujao anaweza kuwa sehemu ya kikosi cha Simba," alifunguka mtoa taarifa ambaye hakutaka jina lake liwekwe hadharani
Katika ripoti ya usajili iliyopendekezwa na Sven Vandenbroeck, Mbelgiji huyo ametaka kuongezewa walinzi wawili, mmoja wa kati na mwingine wa pembeni
Juzi Afisa Mtendaji wa Simba Senzo Mazingisa alisema kuwa hawana wasiwasi kuwapata wachezaji wanaowataka kwani wanalo fungu la kutosha
Alisema wanaweza kumsajili mchezaji yeyote anayecheza ndani, labda watapata changamoto kwa baadhi ya wachezaji wa nje ambao mara nyingi masharti yao huwa ni tofauti
Mazingisa alisema kwa sasa hawajaanza usajili wa wachezaji wapya, lakini wakati ukifika wataweka hadharani nyota wanaowasajili kama walivyofanya msimu uliopita
