Kocha Mkuu wa Taifa Stars Etienne Ndayiragije ametoa maoni kuhusu mjadala wa kupunguzwa idadi ya nyota wa kigeni wanaocheza nchini ambapo amesema kama uamuzi huo utachukuliwa, unaweza kuwa na athari kwa kupunguza ushindani wa vilabu kwenye medani ya Kimataifa
"Soka sasa ni biashara ya Kimataifa. Unapojaribu kupunguza idadi ya wachezaji wa kigeni kwenye nchi yako ni kama unataka kufanya soka lako liwe 'loko'. Kutakuwa na athari timu zinapokwenda kushiriki michuano ya Kimataifa kwani maandalizi yako yatakuwa tofauti," amesema
"Kupunguza idadi ya wachezaji wa kigeni haiwezi kuwa suluhu ya kuinua viwango vya wachezaji wa ndani, jambo linaloweza kufanyika ni kuwahimiza wachezaji wazawa nao wapambane ili wapate nafasi ya kwenda kucheza soka nje"
"Leo hii mngekuwa na wachezaji wengi wanacheza mfano ligi kuu ya Uingereza msingeleta huu mjadala wa kupunguza idadi ya nyota wa kigeni wanaocheza hapa," aliongeza Ndayiragije
Hivi karibuni Waziri mwenye dhamana ya Michezo Dk Harrison Mwakyembe aliliagiza Baraza la Michezo la Taifa (BMT) kuunda sheria ambayo itaweka ukomo wa idadi ya nyota wa kigeni wanaosajiliwa na vilabu nchini
Dk Mwakyembe alisema kama kukiwa na ukomo, vilabu vitakuwa makini katika kusajili wachezaji kutoka nje ya nchi kwani kwa utaratibu wa sasa, wengi wanaosajiliwa wanakosa ubora
