Klabu ya APR ya Rwanda imekanusha taarifa kuwa inanyatia saini ya mshambuliaji kinara wa ligi kuu Tanzania bara anayekipiga katika timu ya Simba, Meddie Kagere.
Taarifa kutoka katika mitandao ya kijamii nchini humo vimeripoti kuwa timu hiyo inataka kumsajili mshambuliaji huyo ambaye tayari msimu huu amefunga mabao 19 kwenye ligi.
Msemaji wa klabu hiyo, Clever Kazungu amesema Kagere bado ana mkataba na Simba na hawana mpango wa kumsajili hivyo watu waache kuwachonganisha na Wekundu hao wa Msimbazi.
Kazungu ameongeza kuwa tetesi kama hizi zinaweza kumfanya Kagere kukosa utulivu na katika kipindi hiki cha mapumziko ya mlipuko wa Virusi vya Corona hivyo amewataka watu kutupilia mbali uvumi huo.
"Sisi kama APR tunapenda kuona wachezaji wengi kutoka Rwanda wanacheza soka nje ya nchi. Kagere ni mali ya Simba na anafanya vizuri sisi hatujawahi kutaka kumrudisha tena hizo taarifa ni uzushi mtupu," alisema Kazungu
