Afisa Habari wa klabu ya Simba Haji Manara amesema wako tayari kucheza na Yanga hata leo hii kama isingekuwa changamoto ya virusi vya COVID-19 vinavyosababisha ugonjwa wa corona
Kumekuwa na maoni ya wadau waliopendekeza kuwa iwapo ligi itashindwa kumalizika kutokana na changamoto ya corona, njia rahisi inayoweza kuchukuliwa ni kupunguza idadi ya mechi kwa ligi kumalizwa kwa mtindo wa 'Play-Off' utakaozikutanisha timu zinazowania ubingwa na zile zinazopambana zisishuke daraja
Akitoa maoni yake kuhusu mapendekezo hayo, Manara amesema haamini kama TFF itafanya maamuzi ya kutumia utaratibu huo. Muhimu kwa sasa ni kuendelea kuomba Mungu ili jitihada zinazofanywa na Serikali katika mapambano ya corona zifanikiwe ili mechi zote zilizobaki zichezwe na bingwa apatikane kwa utaratibu wa kawaida
Lakini amesema hata ikitokea TFF wakatumia utaratibu huo, wako tayari kucheza na timu yoyote ikiwemo klabu ya Yanga ambayo msimu huu wamekutana nayo mara mbili bila kupata ushindi dhidi yao
"Sisi ndio tuko kileleni mwa msimamo wa ligi kwa pointi nyingi, tunawezaje kuihofia timu yoyote ambayo iko chini yetu?," alihoji Manara
"Tena hao Yanga dio tunawatamani kwelikweli kwani katika mechi tulizokutana nao walikuwa na bahati tu. Nimeona maoni mengi ya wachambuzi hapa nchini wanadai katika mchezo uliopita waliotufunga, wanasema wao walicheza vizuri kuliko sisi, jambo hili sio kweli"
"Katika mchezo ule, nyota wa mchezo alikuwa kipa Metacha Mnata, sisi tulikosa nafasi saba za wazi wakati wao walitengeneza nafas mbili tu. Tunajua tunaweza kukutana nao tena kwenye FA, tunawasubiri kwa hamu.." alitamba Manara
Msimu huu Yanga ilijitutumua na kuweza kuondoka na ushindi kwenye mchezo uliopigwa March 08 ikiwa ni mara ya kwanza kuifunga Simba tangu mwaka 2015..!
