Mtendaji Mkuu wa Simba Senzo Mazingisa amesisitiza kuwa klabu hiyo imejiandaa kusajili wachezaji wote waliopendekezwa na kocha wao Sven Vandenbroeck bila ya kujali nchi au timu wanazocheza sasa
Pamoja na kuwepo kwa tetesi nyingi za usajili, Senzo amesema Sven ndiye anayefahamu wachezaji anaowahitaji hivyo Wanasimba wawe na subira wakati mwafaka ukifika watasajili wachezaji hao
"Wakati huu bado dirisha la usajili halijafunguliwa, mengi yanayoripotiwa kwenye vyombo vya habari ni tetesi tu. Sisi tuna utaratibu wetu wa kufanya usajili ambapo ripoti nzima inatoka kwa Mwalimu wetu," amesema
"Hatuna wasiwasi kuwapata wachezaji wote wa ndani tunaowahitaji, labda changamoto inaweza kujitokezwa kwa wachezaji wa nje ya nchi ambao mahitaji yao yanakuwa tofauti. Lakini tutafanya kila linalowezekana kuwapata"
Wadau wa Simba wamepongeza usajili wa Luis Miquissone uliofanyika mwezi Januari, mashabiki wakiwa na shauku kuona Simba inaleta wachezaji wengine wenye uwezo kama wa Miquissone au zaidi
