Klabu ya Simba imedhamiria kushinda mataji yote mawili ligi kuu na kombe la FA ili kujiongezea ushawishi wa kuwanasa wachezaji wazuri kujiunga nao, amesema Mtendaji Mkuu wa Simba Senzo Mazingisa
Kimahesabu, Simba tayari imejihakikishia ubingwa wa ligi kuu, kinachosubiriwa ni kumalizika kwa changamoto hii ya corona ambayo imetangazwa kuwa janga la dunia ili waweze kumalizia mechi zilizobaki
Hivyo kazi kubwa pengine itakuwa kwenye michuano ya kombe la FA ambapo mabingwa hao wa nchi walitinga hatua ya robo fainali
"Nadhani kama tutafanikiwa kuchukua ubingwa wa ligi na Kombe FA, kama malengo yetu yalivyo litakuwa jambo rahisi kwetu kupata wachezaji wazuri wenye uwezo wa kushindana katika ngazi ya Afrika kutokana na uwepo wa tiketi ya kucheza mashindano makubwa ngazi ya klabu ambayo kila mchezaji anayatamani kucheza," amesema Senzo
Kwa sasa Simba inaendelea na michakato ya ndani kuwaongezea mikataba nyota waliomaliza mikataba, lakini pia kukiwa na 'scouting' ya nyota wapya inayofanyika kwa usiri mkubwa
