Wakati Yanga kupitia Makamu Mwenyekiti wao Fredrick Mwakalebela wakitapatapa kuhusu kiungo Clatous Chama, mwamba huyo kutoka jiji la Lusaka nchini Zambia ataendelea kuwa mali ya Simba kwa muda mrefu
Jana Msemaji wa Simba Haji Manara alibainisha kuwa mkataba wa Chama utamalizika mwezi Julai 2021 lakini mpango uliopo ni kuwa Chama ataongezewa mkataba mwingine utakaomuweka Msimbazi kwa muda mrefu zaidi
"Sisi tulikuwa tukiwaangalia wanavyotapatapa kujaribu kumsajili mchezaji ambaye hawana hata uwezo wa kumlipa mshahara...! Chama ni mtu muhimu sana kwenye klabu ya Simba, ataendelea kubaki katika historia ya klabu yetu kwa miaka mingi kutokana na mchango wake kwa klabu yetu," ametamba Manara
Tayari uongozi wa Simba umewasilisha malalamiko TFF kuomba hatua zichukuliwe kutokana na kitendo kilichofanywa na kiongozi wa Yanga kujitokeza hadharani kutangaza klabu yake inataka kumsajili Chama bila ya kuwasiliana na Simba inayommiliki
