Chama cha soka nchini Misri (EFA) kimetangaza kupunguza idadi ya nyota wa kigeni wanaoruhusiwa kusajiliwa na timu za ligi kuu, ligi daraja la kwanza na la pili
Mganda Emmanuel Okwi anayekipiga klabu ya Ittihadi ya Alexandria ni miongoni mwa wachezaji wa kigeni wanaosakata kabumbu huko Misri ambao wanaweza kuathiriwa na sheria hiyo
Kulingana na sheria hiyo mpya itakayoanza kutumika msimu ujao, timu za ligi kuu zitaruhusiwa kusajili wachezaji wanne tu wa kigeni badala ya idadi ya sasa ya wachezaji watano, wakati daraja la kwanza ni wachezaji watatu tu
Kwa zile timu ambazo zina idadi ya wachezaji wa kigeni zaidi ya wale wanaotakiwa, zimetakiwa kujiandaa kupunguza wachezaji hao
Hii inaweza kuwa habari nzuri kwa Simba ambayo inaelezwa kuwa na mkakati wa kumrejesha nyumbani nyota wake Okwi
Okwi alijiunga na Ittihadi mwanzoni mwa msimu kwa mkataba wa miaka miwili
Nyota huyo ameifungia Ittihadi mabao mawili katika mechi 14 za ligi kuu alizocheza
