Uongozi wa klabu ya Simba unaandaa barua kupeleka Shirikisho la soka Tanzania (TFF) kuishitaki klabu ya Yanga baada Makamu Mwenyekiti wao Fredrick Mwakalebela kukiri kuzungumza na kiungo Clatous Chama kutaka kumsajili huku akiwa na mkataba zaidi ya miezi sita.
Jana Mwakalebela alinukuliwa na baadhi ya radio hapa hapa jijini akisema wamezungumza na raia huyo wa Zambia kutaka kumsajili katika dirisha lijalo kitu ambacho ni kinyume na kanuni.
Manara amesema mkataba wa Chama utamalizika Julai mwaka 2021 hivyo kitendo cha Mwakalebela kutoka hadharani kusema wamefanya mazungumzo nae ni kukiuka kanuni za soka na suala ambalo watalifikisha TFF.
Msemaji huyo ameongeza kuwa klabu ya Yanga haijifunzi kwakua waliwahi kupigwa faini ya milioni 50 kwa kosa la kumtangaza mlinzi Hassan Kessy kabla ya mkataba wake kumalizika na sasa watapigwa nyingine kwa Chama.
"Tutaiandika barua TFF kuhusu Mwakalebela kuongea na mchezaji wetu mwenye mkataba na kuvunja kanuni za ligi, katika suala hili hatuwezi kukaa kimya," alisema Manara
