Wakati siku nne zikiwa zimesalia kumalizika kwa siku 30 zilizotolewa na Serikali kusitisha shughuli zote za michezo nchini kutokana na janga la corona, upo uwezekano mkubwa Serikali itaongeza muda wa katazo hilo kutokana na mwenendo wa maambukizi ya virusi vya corona nchini
Tayari Shirikisho la Mpira wa Miguu Tanzania (TFF) limebainisha kuwa ratiba zake zote za saka nchini hazitaendelea hadi pale Serikali itakapotoa ruhusa
Aidha Shirikisho la soka duniani (FIFA) kupitia Rais wake Gian Infantino, limeshauri kuwa nchi hazipaswi kuharakisha kurejesha ligi zao kabla ya kujiridhisha na hali ya usalama wa raia wake kutokana na janga la corona
"Hakuna mechi, hakuna mashindano, hakuna ligi ni bora kujali maisha ya wanadamu, ni vizuri tukasubiri zaidi kuliko kujiweka katika hatari," alisema
Soka linaendelea katika mataifa machache kama vile Belarus, Burundi, Nicaragua na Tajikistan. Infantino, aamesisitiza kuwa usalama unatakiwa kutangulia kwanza na mengine yatafuatia.
"Kila mmoja kichwani mwake lazima kuwe na mawazo ya janga hili, itakuwa zaidi ya kutowajibika endapo kutakuwa na kulazimisha kufanyika kwa mashindano kama mambo hayako salama kwa asilimia 100, "alisema Infantino.
