Kocha Msaidizi wa klabu ya Simba, Selemani Matola, amesema upo ugumu kuwafuatilia wachezaji kwa wakati huu kama wanafanya mazoezi au la katika kipindi hiki ambacho virusi vya Corona vimesitisha shughuli zote za michezo duniani
Corona imesababisha shughuli za soka duniani kote kusimama, ikiwemo Ligi Kuu Tanzania Bara, ikiwa ni agizo la serikali la kusimamisha shughuli zote za kuzuia mikusanyiko lililotolewa mwezi uliopita.
Matola amesema kwa sasa sio rahisi kuwafuatilia wachezaji mmoja mmoja kubaini kama wanafanya mazoezi au la
"Kwa sasa ni ngumu kujua kwamba wachezaji wanafanya mazoezi ama la kutokana na mfumo wa maisha kuwa tofauti na kila mmoja kuwa na mtindo wake mwenyewe", amesema Matola.
"Kinachotakiwa ni kwa kila mchezaji kuwa makini kufanya yale aliyoelekezwa ili awe bora na imara pale ligi itakaporejea", ameongeza kocha huyo ambaye pia aliwahi kuwa mchezaji wa klabu hiyo.
Maoni ya Matola yanaakisi kile kilichosemwa na kocha mkuu wa mabingwa hao wa nchi Sven Vandenbroeck ambaye amependekeza TFF kuvilabu vilabu angalau wiki mbili za kujifua pale ligi itakaporejea
Hatma ya mshikemshike wa ligi kuu kuendelea inasubiri uamuzi wa Serikali kulingana na mwenendo wa maambukizi ya virusi vya Corona
