Kocha mkuu wa timu ya Ndanda FC, Meja mstaafu Abdul Mingange ameliomba Shirikisho la soka Tanzania (TFF) liwape muda wa wiki moja kujiandaa ligi ikirejea kwakua ana imani wachezaji hawatakuwa fiti.
Ligi imesimama kwa mwezi mmoja kwa ajili ya kujikinga na maambukizi ya ugonjwa wa virusi vya Corona ambavyo tayari vimeingia nchini.
Meja Mingange amesema wachezaji wengi wa Tanzania sio professional kwahiyo kipindi hiki wanaweza wakaona ni mapumziko kwahiyo ligi ikiendelea wanakuwa kama wanaanza upya hivyo wanahitaji muda kukaa sawa.
Kocha huyo ameongeza kuwa wamewapa wachezaji wao program za kufanya mazoezi nyumbani lakini kuzifuatilia huenda ikawa ngumu hivyo wakarejea wakiwa hawapo fiti.
"Ninadhani TFF itupe wiki moja ya kujiandaa ligi ikirejea maana kwa wachezaji wetu hawa watarudi wakiwa hawako fiti kwahiyo itakuwa ngumu kama wataanza ligi moja kwa moja.
"Wachezaji wangu nilisha waandaa kucheza dakika 90 lakini wakirudi huenda wasiwe fiti kucheza hata dakika 60 kwahiyo nadhani tunapaswa kupata muda wa kufanya mazoezi ya pamoja kabla ya ligi kuendelea," alisema Meja Mingange
