Kiungo wa Simba raia wa Barazil Gerson Fraga, amesema ana furaha kuwatumikia mabingwa hao wa nchi akiwa na imani kuwa ataendelea kubaki Msimbazi
Mkataba wa Fraga unaelekea ukingoni, alitua Simba mwanzoni mwa msimu akitokea nchini India
Fraga amesema anajisikia faraja kucheza kwenye kikosi cha Simba ambacho kimesheheni nyota wengi wenye vipaji
Amewataja wachezaji wanaomvutia zaidi ni pamoja na Francis Kahata, Hassan Dilunga, Meddie Kagere, Miraji Athumani na Deo Kanda.
"Deo Kanda napenda zile chenga zake za maudhi, kama anakwenda huku anarudi.. Namkosa sana Miraji, nilimuuliza lini unakuja, akasema karibuni," alisema kwa Kiswahili chake cha kubabaisha.
Katika mahojiano ya mtandaoni na mashabiki wa Simba juzi, Fraga alibainisha kuwa chakula anachokipenda mno Tanzania ni makange, nyama ya mbuzi na ugali, akidai kuwa akipata chakula hicho na chupa ya maji siku yake inakuwa nzuri mno, tofauti na vyakula vingine.
Mechi yake kubwa anayoikumbuka ya Ligi Kuu ni ile ambayo Simba ilicheza dhidi ya Coastal Union ya Tanga.
Kwenye mechi hiyo Fraga alifunga mabao yote mawili ya ushindi, Simba ikiitandika Coastal 2-0 kwenye Uwanja wa Uhuru Februari Mosi, mwaka huu.
Hata hivyo, amesema bao lake bora ni lile alilolifunga kwenye mechi dhidi ya KMC katika mzunguko wa kwanza wa Ligi Kuu, Desemba 28, mwaka jana alipofunga dakika za nyongeza, Simba ikishinda mabao 2-0, baada ya Kanda kuitanguliza mbele
Mpaka sasa Fraga ana mabao matatu kwenye Ligi Kuu Tanzania Bara, ingawa kwa siku za karibuni amekuwa hapati sana nafasi ya kuanza kikosi cha kwanza.
