Wadau mbalimbali wa klabu ya Simba wametoa maoni yao kuhusu maboresho ya usajili ambayo wangependa kuyaona kipindi cha usajil kinachokuja
Wakati ligi ikiwa imesimama kutokana na janga la ugonjwa wa Corona, kimahesabu Simba ina nafasi kubwa zaidi ya kutetea ubingwa wake kwa msimu wa tatu mfululizo
Hivyo mabingwa hao wa nchi msimu ujao watakuwa na jukumu la kuibeba Tanzania kwenye michuano ya ligi ya mabingwa barani Afrika
Mwaka juzi Simba ilifanikiwa kutinga robo fainali ya michuano hiyo na kuisaidia Tanzania kupata nafasi nne za uwakilishi kwenye michuano hiyo
Lakini msimu uliopita pasipo na matarajio ya wengi, Simba iliondoshwa katika hatua za awali
Ili kuhakikisha timu inafanya vizuri msimu ujao, kwa maoni ya wengi, kuna haja ya kufanyika maboresho kwenye baadhi ya maeneo
1. Beki wa kati
Pamoja na wakongwe Paschal Wawa na Erasto Nyoni kuweza kuhimili mikiki mikiki ya Ligi Kuu, wengi wanaona Simba inahitaji kusajili walinzi wengine wenye uzoefu wa mechi za Kimataifa ambao watasaidiana nao
Mabeki hao umri umewatupa mkono na wamekuwa wakisumbuliwa na majeraha ya mara kwa mara
Walinzi wengine ukiondoa wao hawafikii ubora wa kuihakikishia Simba kufanya vizuri kwenye michuano ya ligi ya mabingwa
2. Mlinzi wa kulia
Shomari kapombe ndiye anayetegemewa zaidi kwa sasa baada ya Haruna Shamte kushindwa kuonyesha makali yake
Wadau wanaamini nafasi hii inapaswa kuongezewa nguvu
3. Mshambuliaji
John Bocco na Meddie Kagere bado wanao uwezo wa kuibeba Simba kwenye michuano ya Kimataifa. Lakini changamoto yao haina tofauti na ya Wawa na Nyoni
Hofu kubwa ni pale inapotokea mshambuliaji mmoja au wote wakipata majeraha. Nje Simba haina mshambuliaji wa aina yao ambao anaweza kuchukua nafasi wanapokosekana
Msimu huu Bocco alikaa nje kwa muda mrefu kutokana na majeraha. Kuna wakati kukosekana kwake kuliipa changamoto safu ya ushambuliaji ya Simba kwani Kagere aliachiwa mzigo mkubwa peke yake
Hili ni eneo ambalo wanasimba wengi wamependekeza liongezwe nguvu
Smba kusajili nyota watano
Mtendaji Mkuu wa Simba Senzo Mazingisa amefunguka kuwa wameshapokea mapendekezo ya kocha Sven Vandenbroeck kuhusu usajili
Wanatarajia kusajili wachezaji wapya watano ambapo usajili huo utazingatia kwa kiasi kikubwa maoni ya wadau
"Kocha ametupa mapendekezo yake, anataka mabeki watatu, kiungo na mshambuliaji. Tutakuwa makini kuhakikisha tunapata wachezaji ambao watakuwa na hadhi ya kuitumikia timu yetu"
"Mwezi Januari tumeanza na Miquissone, Wanasimba wawe na subira kila kitu kitakwenda sawa"
Simba tayari imelitawala soka la Tanzania hivyo mashabiki kwa sasa wanataka kuona mabingwa hao wa nchi wakichomoza kwenye anga za Kimataifa kwa kula sahani moja na vigogo kama Al Ahly, TP Mazembe, Zamaleki, Esperance, Mamelodi Sundows, Wyday Athletic n.k
