Mo asubiri kukamilika mchakato wa mabadiliko

MO tayari ameshinda zabuni ya kuwa mwekezaji mkubwa klabuni hapo kwa dau la Sh20 bilioni akichukua asilimia 50 ya hisa japo Serikali imeweka utaratibu wa mwekezaji kupewa asilimia 49 tu.

Bilionea huyo sasa anasubiri kukamilika kwa mchakato wa mabadiliko ili kuanza kazi, ambapo mmoja wa wasimamizi wa mchakato huo, Mulamu Nghambi amesema mpaka kufikia Juni mwaka huu mambo yatakuwa mazuri Msimbazi.

Nghambi alisema baada ya kumalizika kwa msimu wa sikukuu sasa wanaendelea pale walipoishia ili kukamilisha zoezi hilo la kuipeleka Simba kwenye mfumo wa hisa.

“Kwa msimu huu mambo yataendelea kwa utaratibu uliokuwepo, lakini msimu ujao lazima timu itakuwa tayari imehamia kwenye mfumo wa hisa,” alisema Nghambi.

“Kama ni usajili au mabadiliko mengine makubwa ni mpaka msimu ujao. Hata huyo kocha mpya anayetajwa (Hubert Velud) nadhani analetwa kwa ajili ya malengo ya muda mrefu, ili atengeneze timu ya maana kuanzia msimu ujao,” alisema.

“Kwa upande wa mchakato sehemu ngumu imekwisha, sasa tunaweka tu mambo sawa ili mfumo mpya uweze kufanya kazi tofauti na ule wa zamani kwa ajili ya kuleta utofauti uliokusudiwa,” alisisitiza Nghambi.