Kumekuwa na maswali kutoka kwa mashabiki juu ya kutowaona baadhi ya wachezaji kwenye kikosi cha kwanza kwa muda mrefu
Hata hivyo Mkufunzi wa Simba Sven Vandenbroeck amesema anatambua kuwa kikosi chake kimejaa wachezaji wenye vipaji lakini ni muhimu wakadhihirisha uwezo wao pale wanapopewa nafasi
Wadau wa Simba wamekuwa wakihoji alipo beki Yusufu Mlipili ambaye msimu huu hajaonekana kwenye kikosi cha kwanza licha ya kuonekana katika mazoezi ya mabingwa hao wa nchi
"Nafahamu mashabiki wanapenda kuwaona baadhi ya wachezaji wakipata nafasi, hilo ni jambo jema kwani wachezaji wote tumewasajili kwa kuwa ni wazuri na tunataka waipe timu yetu mafanikio"
"Bahati mbaya katika mechi moja hatuwezi kutumia wachezaji zaidi ya 14, hivyo mara nyingi tunawapa nafasi wachezaji ambao wameonyesha utayari wa kucheza"
"Kila mchezaji ana nafasi sawa ya kucheza kama alivyo mwingine lakini ni muhimu akaonyesha mazoezini na anapopewa nafasi ya kucheza kuwa anastahili kuwemo kwenye kikosi cha kwanza," alisema Sven
Ukiondoa Miraji Athumani ambaye ni majeruhi wa muda mrefu, nyota wengine ambao wamekuwa na nafasi finyu ya kuonekana kwenye kikosi cha Sven ni Ibrahim Ajib, Shiza Kichuya, Gadiel Michael, Said Ndemla na Mzamiru Yassin ambaye mara ya mwisho alionekana dimbani kwenye mchezo wa kwanza wa watani wa jadi Januari 04 2020
