Kocha Mkuu wa Simba Sven Vandenbroeck amewaomba radhi mashabiki wa klabu hiyo baada ya kupoteza mchezo dhidi ya Yanga hapo juzi
Sven ambaye ameiongoza Simba katika mechi zote mbili dhidi ya Yanga msimu huu na kuambulia alama moja, amesema anafahamu machungu waliyopata mashabiki lakini kama timu walipambana kuhakikisha wanaibuka na ushindi
Amesema kikosi chake kiko tayari kuwapa furaha mashabiki kwenye mchezo unaofuta dhidi ya Singida United ambao utapigwa kesho Jumatano
"Ni matokeo yaliyotuumiza sisi sote, lakini nawaambia mashabiki wetu wasikate tamaa. Tulicheza vizuri na kutengeneza nafasi nyingi kuliko wapinzani wetu lakini hatukuzitumia.
"Mpira ni mchezo wa makosa, tumefanya kosa moja wenzetu wakatuadhibu. Tumesahau matokeo hayo na sasa tunajipanga kwa mchezo unaofuata. Tunahitaji kushinda ili kuhakikisha tunatimiza lengo la kutwaa ubingwa," amesema Sven
Simba inaongoza ligi ikiwa imejikusanyia alama 68 baada ya kushuka dimbani mara 27
Kimahesabu, inahitaji kushinda mechi saba kati ya 11 zilizobaki ili kujihakikishia ubingwa wa tatu mfululizo
