Mtendaji Mkuu wa Simba Senzo Mazingisa amesema timu hiyo inajipanga kuimarisha kikosi chake kwa ajili ya michuano ya ligi ya mabingwa barani Afrika itakayoanza mwezi August mwaka huu
Baada ya Simba kuwa katika nafasi nzuri ya kutetea ubingwa, tayari kocha mkuu wa timu Sven Vandenbroeck ameweka mezani mapendekezo yake ya usajili
Inaelezwa Mbelgiji huyo tayari ameuweka sawa uongozi wa Simba uandae bajeti ya kutosha ili kuweza kusajili wachezaji watakaokuwa na mchango mkubwa kwenye michuano hiyo
"Kuna maeneo ambayo kocha ametuambia na tayari tumeanza kuwafuatilia wachezaji ambao watakuja ni wenye vigezo vya kucheza Simba, tutaangalia bajeti yetu ili kuweza kusajili wachezaji wanaoendana na hadhi ya Simba kwa kutoka kila pembe ya Afrika," amesema Senzo
Aidha Senzo amesema msimu ujao wamejipanga kuhakikisha wanaunda kikosi imara ambacho kitaweza kufanya vizuri kwenye michuano hiyo
"Kutolewa mapema kwenye michuano ya mwaka huu lilikuwa somo kwetu, hatutarudia makosa. Tumejipanga kuimarisha kikosi chetu kwa kuongeza wachezaji ambao watatusaidia kufanya vizuri"
Miongoni mwa maeneo ambayo yanatarajiwa kufanyiwa maboresho ni eneo la safu ya ulinzi ambalo kwa sasa linawategemea zaidi wakongwe Paschal Wawa na Erasto Nyoni
Hata hivyo mabeki hao umri umewatupa mkono hivyo kuwepo kwa ulazima wa kuongeza nguvu hasa baada ya nyota wengine waliosajiliwa kwenye nafasi zao kushindwa kufikia matarajio
