Kocha Mkuu wa Simba Sven Vandenbroeck tayari ameshaona ubingwa wa tatu mfululizo unanukia Msimbazi na sasa anataka kuuweka kibindoni mapema zaidi
Kesho Sven ataiongoza Simba kuikabili KMC katika mchezo utakaopigwa saa mbili usiku uwanja wa Taifa
Ni mchezo ambao Mbelgiji huyo amesema wanahitaji kusepa na alama zote tatu pia washinde michezo mingine itakayofuata kabla ya ligi kusimama March 18
"Tunafahamu ligi itasimama March 18 kuipa nafasi timu ya Taifa kwenda kushiriki michuano ya CHAN, tutacheza mechi tatu hadi nne. Tunahitaji kushinda mechi zote ili kujiweka katika nafasi nzuri ya kutetea ubingwa"
"Tunahitaji kupata matokeo kuanzia mchezo dhidi ya KMC. Tumefanya maandalizi ya kutosha na tuna matumaini makubwa ya kufanya vizuri. Mashabiki waje kwa wingi wapate burudani," amesema
Miongoni mwa michezo ambayo Simba itacheza wiki ijayo ni dhidi ya Azam Fc na Yanga. Ushindi katika mechi hizi utaisogeza Simba karibu zaidi ya ubingwa
