Mabingwa wa nchi Simba leo wametakata uwanja wa Taifa baada ya kuichapa Kagera Sugar bao 1-0 katika mchezo wa ligi kuu ya Vodacom
Bao pekee la ushindi kwa upande wa Simba lilifungwa Meddie Kagere kupitia mkwaju wa penati kwenye dakika ya 61 baada ya nahodha John Bocco kufanyiwa madhambi na mlinda lango Benedict Tinocco ndani ya eneo la hatari
Achana na ushindi huo, Simba leo ilikuwa bora sana, kocha Sven Vandenbroeck na vijana wake, wametimiza ahadi ya kuwapa burudani mashabiki
Ni mchezo ambao Simba ilikuwa bora sana, ilistahili kupata ushindi mnono zaidi
Ushindi huo umewafanya vinara hao wa ligi wafikishe alama 59, wakiongoza ligi kwa tofauti ya alama 15
Kwa hakika ni muujiza pekee ambao utaifanya Simba ikose ubingwa wa tatu mfululizo
Kandanda zuri, ushindi mujarabu, Simba hii haitakuwa rahisi kuizuia
