Baada ya mshambuliaji wa Simba, Meddie Kagere, kuonekana amepunguza kasi katika upachikaji wa mabao, mabadiliko ya mfumo wa uchezaji yanaweza kumrejesha Mnyarwanda huyo kwenye ubora wake wa kuzifumania nyavu
Licha ya Kagere kuongoza katika orodha ya wafungaji wa Ligi Kuu Tanzania Bara akiwa na mabao 12, lakini kasi yake ya kufunga imepungua tofauti na msimu uliopita aliochukua kiatu cha dhahabu kwa kutupia mabao 23.
Baada ya Aussems kuondoshwa kocha mpya Sven Vandenbroeck alikuja na mfumo tofauti ambapo amekuwa akitumia kuchezesha mshambuliaji mmoja mbele, jambo lililomfanya atumie viungo wengi
Baada ya kubaini mapungufu, Sven amerejesha mfumo wa kuwatumia washambuliaji wawili mbele na sasa Kagere atakuwa anasimama na John Bocco.
Mfumo wa kuchezesha washambuliaji wawili ulianza kumpa matunda mazuri katika mchezo uliopita ambao walishinda mabao 3-0 dhidi ya Mtibwa Sugar.
Katika mchezo huo, Bocco ndiye alifunga bao la kwanza kutokana na kazi nzuri aliyofanya Kagere
Sven amekiri kuwa mfumo wa 4:4:2 alioanza kuutumia kwa kumwanzisha Kagere na Bocco pamoja umekuwa na mafanikio.
"Pacha ya Bocco na Kagere wakicheza pamoja inafanya timu kuwa na uwezo mkubwa wa kupeleka mashambulizi mbele, nina imani tutafunga mabao mengi zaidi kama itaendelea hivi," alisema.
Washambuliaji hao huenda wakaongoza safu ya ushambuliaji kwenye mchezo wa ligi kuu kesho dhidi ya Lipuli Fc ambao utapigwa uwanja wa Samora mkoani Iringa
