Kikosi cha Simba kimeelekea mkoani Morogoro kwa ajili ya mchezo wa ligi kuu dhidi ya Mtibwa Sugar
Mchezo huo utapigwa siku ya Jumanne, Februari 11 kwenye uwanja wa Jamhuri
Baada ya kupoteza mchezo uliopita kwa kufungwa bao 1-0 na JKT Tanzania, mkufunzi wa Simba Sven Vandenbroeck anahitaji kuhakikisha vinara hao wa ligi kuu wanarejesha utamaduni wao wa burudani na ushindi
Ni mchezo ambao kama matokeo yatakuwa tofauti, Mbelgiji huyo anaweza kukutana na mabegi yake mlangoni atakaporejea jijini Dar es salaam
Sven aliitwa kujieleza kwa nini siku za karibuni timu imekuwa ikicheza chini ya kiwango katika kikao ambacho kiliwahusisha mabosi wa Simba wakiongozwa na Mtendaji Mkuu Senzo Mazingisa na Mwenyekiti Mwina Kaduguda
Kikao hicho kilikuwa kama mtego kwake kwani kama timu haitaonyesha mabadiliko anaweza kutimuliwa
Aidha Senzo alipoulizwa kuhusu hatma ya kocha huyo, alisema Sven anaendelea kuinoa Simba lakini hatma yake itabaki mikononi mwa Mwenyekiti wa Bodi ya Wakurugenzi Mohammed Dewji 'Mo'
