Mtendaji Mkuu wa Simba Senzo Mazingisa amesema hakuna tofauti yoyote kwenye benchi la ufundi la timu hiyo
Mazingisa ametoa kauli hiyo baada ya kuendelea kushamiri kwa tetesi kuwa Mkufunzi Mkuu wa Simba Sven Vandenbroeck hapikiki chungu kimoja na Kocha Msaidizi Selemani Matola pamoja na wataalam wengine wa benchi la ufundi
Senzo amesema sintofahamu hiyo inatengenezwa na vyombo vya habari tu kwani hajawahi kupokea malalamiko kutoka kwa kocha au viongozi wengine wa benchi la ufundi
"Malalamiko ya kutokuwepo maelewano kwenye benchi la ufundi hayapo, hakuna tatizo lolote, habari hizi tunazisikia kutoka kwenu (Wanahabari) lakini hakuna ukweli wowote," amesema Mazingisa
Aidha akizungumzia kiwango kinachoonyeshwa na Simba chini ya Sven, Mazingisa amekiri kuwepo mapungufu lakini amesema zipo sababu likiwemo suala la majeruhi
Amesema benchi la ufundi linaendelea kufanyia kazi changamoto hizo
Kumekuwa na taarifa kuwa uongozi wa Simba unaweza kuchukua uamuzi mgumu wa kuachana na Vandenbroeck baada ya kutoridhishwa na kiwango cha timu
Lakini pia inaelewa kocha huyo hana ushirikiano mzuri na makocha wenzake wa benchi la ufundi
Mmoja wa viongozi wa Simba amekiri kuwepo kwa tofauti hiyo ambapo Sven anatuhumiwa kutumia ubabe na lugha zisizo za kistaarabu kwa wasaidizi wake
Aidha Sven pia amekuwa hatoi ushirikiano kwa wanahabari, mara kwa mara akigoma kuzungumza nao wanapohoji masuala mbalimbali
Sven amekataa kufanya mahojiano ya wanahabari katika mazoezi ya Simba na hata mahojiano ya kabla ya mchezo
Ni tofauti na mtangulizi wake Patrck Aussems ambaye alitoa taarifa kwa wanahabari kuhusu mwenendo wa kikosi chake mara kwa mara
