Mabingwa wa soka Tanzania Bara Simba leo wataendelea na kampeni ya kutetea ubingwa wao kwa msimu wa tatu mfululizo watakapowakaribisha maafande wa Polisi Tanzania katika mchezo wa ligi kuu ambao utapigwa uwanja wa Taifa
Mchezo huo unatarajiwa kuchezwa kuanzia saa moja jioni
Ni mchezo wa raundi ya 19 unayokamilisha duru ya kwanza ya ligi kuu ya Vodacom
Hii ni nafasi nyingine kwa mabingwa hao wa nchi kuendelea kujiimarisha kileleni mwa msimamo wa ligi, ushindi utawafanya wafikishe alama 50
Kwa Selemani Matola, kocha msaidizi wa Simba, utakuwa mchezo wa kwanza dhidi ya waajiri wake wa zamani
Matola aliiongoza Polisi Tanzania mwanzoni mwa msimu kabla ya kujiunga na Simba mwezi Novemba 2019
Afisa habari wa Simba Haji Manara amewataka mashabiki wajitokeze kwa wingi kuiunga mkono timu yao kuhakikisha wanaondoka na alama zote tatu
"Tukutane Taifa saa moja jioni leo Jumanne kuzisaka alama tatu muhimu dhidi ya PolisiTanzania. Mchezo upo kwenye uwanja Mkuu wa Taifa, Inshaallah tutazichukua"
