Mshambuliaji kinara wa mabao kwenye kikosi cha Simba Meddie Kagere amesema tuzo ya mfungaji bora msimu huu sio kipaumbele kwake muhimu anataka kuisaidia Simba kutwaa taji 21 la Ligi Kuu Bara.
Simba imetwaa mataji 20 ya ligi ikiachwa kwa mataji saba na wapinzani wao Yanga wenye mataji 27, endapo watafanikiwa kulitwaa msimu huu watabakiza deni la mataji sita tu
Msimu wake wa kwanza akiwa na Simba 2018/19, Kagere alifunga mabao 23 katika ligi na timu yake ilitwaa kombe kwa mara ya pili mfululizo ikimaliza na pointi 93, huku ikifunga mabao 77
Mpaka sasa Kagere amefunga mabao 12, akihitaji kufunga mabao 11 katika mechi 20 zilizobaki ili kufikia rekodi yake ya msimu uliopita
"Nafasi yangu na kazi yangu inaniruhusu kufunga na kutengeneza mabao, ninamshukuru Mungu kwa hili, mashabiki pia nawashukuru kwa kuwa wananipa sapoti, nitazidi kupambana ili kuhakikisha tunatetea ubingwa mara ya tatu" alisema Kagere
"Sifikirii sana ufungaji bora, jambo kubwa kwangu na kwa wachezaji wote wa Simba ni kuhakikisha tunatwaa ubingwa ili tupate nafasi ya kushiriki michuano ya CAF msimu ujao"
Mpaka sasa Simba iko kwenye nafasi nzuri ya kutetea ubingwa kwake licha ya kuwa bado ni mapema, inaongoza ligi ikiwa imejikusanyia alama 47, alama 10 zaidi ya Azam Fc inayofuata nafasi ya pili
