Mabingwa wa soka Tanzania Bara Simba majira ya saa mbili na robo usiku wa leo watashuka kwenye uwanja wa Amaan kumenyana na Azam Fc katika mchezo wa nusu fainali kombe la Mapinduzi
Mshindi wa mchezo huo atatinga fainali ambapo katika hatua hiyo atachuana na Mtibwa Sugar iliyoiondosha Yanga kwa mikwaju ya penati jana
Mchezo huo unatarajiwa kuwa na ushindani mkali hasa ukizingatia ubora wa timu zote
Mwaka jana timu hizo zilikutana fainali na Azam Fc kuibuka mabingwa kwa ushindi wa mabao 2-1
Msimu huu tayari zimekutana mara mbili, mchezo wa Ngao ya Jamii ambao Simba ilishinda 4-2 na kwenye ligi Simba ikiibuka kwa ushindi wa bao 1-0
Kocha Msaidizi wa Simba Selemani Matola amesema wanatarajia kupata upinzani mkali kutoka kwa Azam Fc lakini lengo lao ni kutinga fainali ya michuan hiyo ambayo ni maalum kwa ajili ya maadhimisho ya kumbukumbu ya Mapinduzi ya Zanzibar
Kocha Mkuu wa Simba Sven Vandenbroeck anatarajia kutumia kikosi chake cha kwanza kwani nyota wote wa timu hiyo wako visiwani Zanzibar
Mashabiki wa Simba walikuwa na shauku kubwa ya kukutana na Yanga hatua ya fainali, kutolewa kwa Yanga kunaweza kupunguza msisimko hasa ikizingatiwa huenda kusiwe na mchezo wa kusaka mshindi wa tatu
