Kocha Msaidizi wa Simba Selemani Matola amesema mchezo wa nusu fainali kombe la Mapinduzi dhidi ya Azam Fc hautakuwa mwepesi
Akizungumzia maandalizi ya kikosi chake, Matola amesema vijana wake wako tayari kwa mchezo huo unaotarajiwa kuwa na ushindani mkali
Matola amesema Azam Fc ni moja ya timu bora Tanzania kutokana na uwekezaji mkubwa waliofanya
"Mchezo huo hautakuwa mwepesi kwa kuwa tunakwenda kucheza na moja ya timu bora nchini. Wachezaji wetu wako tayari, tuna matumaini makubwa ya kufanya vizuri," amesema Matola
Akizungumzia mabadiliko ya mara kwa mara ya kikosi yanayofanywa na kocha Sven Vandenbroeck, Matola amesema wanalazimika kufanya hivyo kutokana na ratiba ya mechi zinazowakabili
"Tumetoka kucheza mechi za ligi mfululizo, na michuano hii ya Mapinduzi kwa wastani tunacheza kila baada ya siku tatu. Wachezaji wetu sio roboti lazima tuwape muda wa kupumzika. Mara nyingi tumesema katika kikosi chetu, kila mchezaji anaweza kupata nafasi ya kucheza kwenye kikosi cha kwanza"
Simba itamenyana na Azam Fc kesho Ijumaa katika mchezo ambao utapigwa uwanja wa Amaan saa mbili na robo usiku
